३ वर्षभित्र आधारभूत खानेपानीः मन्त्री मगर, हिमाली क्षेत्रमा स्प्रिङ वाटरको सम्भाव्यता खोज्न विश्व बैंकलाई आग्रह


काठमाडौं । खानेपानी मन्त्री बिना मगरले तीन वर्षभित्र आधारभूत खानेपानीको सुविधा जनतामा पुर्याउन मन्त्रालय योजनाका साथ लागिरहेको बताएकी छन् । विश्व बैंकका प्रतिनिधिहरुसँग बुधबार सिंहदरबारस्थित मन्त्रालयमा भएको छलफलमा मन्त्री मगरले यस्तो बताएकी हुन् ।
मन्त्री मगरले उपभोक्ता समिति र स्थानीय समुदायहरूको सहभागिता गराई खानेपानी तथा पूर्ण सरसफाईलाई प्राथमिकतामा राखिएकोसमेत बताइन् । छलफलमा विश्व बैंकका निर्देशक स्टेभन स्कनबर्गरले खानेपानी तथा सरसफाईको क्षेत्रमा नेपाल सरकारसँग सहकार्य गर्न विश्व बैंक सधैं तयार रहेको बताए ।
धेरै देशका खानेपानी मन्त्रीहरुसँग भेट गरेको स्मरण गर्दै स्कनबर्गरले नेपालको खानेपानी मन्त्री यो क्षेत्रमा ज्ञाता रहेको बताए । निर्देशक स्कनबर्गरको नेतृत्वमा आएको ६ सदस्यीय  प्रतिनिधिबीच मन्त्रालयलमा छलफल भएको हो ।
मन्त्रालयका सचिव दीपेन्द्रनाथ शर्माले विश्व बैंकसँग सधैंभरि सहकार्य गर्न मन्त्रालय तयार रहेको प्रतिवद्धता व्यक्त गरे । छलफलमा मन्त्री मगरले दीगो विकासका लक्ष्यहरु हासिल गर्न सरकार रफ्तारमा अघि बढेको बताएकी छन् । 
“सबैका लागि आधारभूत र सुरक्षित पिउने पानीमा सर्वसुलभ पहुँच पुर्याउन सरकार योजनाका साथ अघि बढिरहेको छ,” मन्त्री मगरले भनिन्, “दीगो विकासका लक्ष्यहरु हासिल गर्न निकै चुनौति छ तर पनि सरकार पृथक ढङ्गले यो लक्ष्य हासिल गर्न योजना बनाएर अघि बढिरहेको छ । जनताले अझै पनि खानेपानीका लागि संघर्ष गर्नुपरेको छ । यस्तो समस्या हटाउन मन्त्रालयले नयाँ योजना र कार्यक्रमहरु बनाउँदैछ ।”
ग्रामीण क्षेत्रमा फण्ड बोर्डमार्फत खानेपानीको आयोजना सञ्चालन गर्न विश्व बैंकले गरेको सहयोगको मन्त्री मगरले प्रशंसा गरिन् । मन्त्री मगरले ग्रामीण क्षेत्रमा जलाशययुक्त र लिफ्टिङ ग्राभिटी खानेपानी योजना साथै सहरी क्षेत्रमा २४ सै घण्टा सातै दिन प्रशोधित खानेपानी योजना र फोहोर पानी प्रशोधित योजनामा सहयोग गर्न विश्व बैंकलाई आग्रह गरेकी छन् ।
तराई मधेस क्षेत्रमा आर्सेनिक मुक्त थोक वितरण प्रणाली खानेपानी आयोजना सञ्चालन गर्नुपर्ने भएकाले यस क्षेत्रमा पनि सहयोग गर्न मन्त्री मगरले विश्व बैंकको ध्यानाकर्षण गराइन् । हिमाली क्षेत्रमा स्प्रिङ वाटरको सम्भाव्यता खोजी गर्न समेत मन्त्री मगरले आग्रह गरिन् । 

source : https://baahrakhari.com/news-details/177055/2019-03-14?fbclid=IwAR1MJOkC9sVK6dRO5c9-a49qraUFPKktGYmpvkN-AnNq170qez9PpbU-OwM

https://baahrakhari.com/news-details/177055/2019-03-14?fbclid=IwAR1MJOkC9sVK6dRO5c9-a49qraUFPKktGYmpvkN-AnNq170qez9PpbU-OwM
प्रतिक्रिया दिनुहोस्